Protestuesit dorëzojnë simbolikisht në Qeveri projektligjin për Ligjin e Speciales

Në përfundim të protestës gjithëpopullore të së enjtes, e mbajtur në Prishtinë në mbrojtje të UÇK-së dhe kundër aktgjykimit të Gjykatës Speciale ndaj ish-krerëve të UÇK-së, protestuesit kanë dërguar simbolikisht te objekti i Qeverisë së Kosovës dosje të mbushura me projektligjin për ndryshimin e Ligjit për Dhomat e Specializuara.

Projektligji është propozim i Partisë Demokratike të Kosovës (PDK), e cila ka kërkuar rishikimin e ligjit që i dha jetë Gjykatës Speciale — një ndër kërkesat kryesore të artikuluara gjatë marshit të 1 tetorit në sheshin e kryeqytetit.

Fillimisht protestuesit u penguan nga kordoni policor që t’i afroheshin ndërtesës së ekzekutivit, por disa prej tyre u lejuan ta kryenin dorëzimin simbolik, siç raporton Klan Kosova. Pas dorëzimit, pjesëmarrësit u shpërndanë paqësisht nga zona e qeverisë.

Ngjarja shënoi përmbylljen e protestës së 1 tetorit në Prishtinë, ku mijëra qytetarë u mblodhën për të shprehur mbështetjen për UÇK-në dhe për të kundërshtuar vendimin e Gjykatës Speciale ndaj ish-krerëve të saj.