Putin në forumin Valdai: bota po kalon një moment të rrezikshëm, paralajmëron Perëndimin për Kaliningradin

Duke folur në forumin ndërkombëtar “Valdai” të ekspertëve të Rusisë në Moskë, presidenti rus paralajmëroi drejtpërdrejt: “Nëse vjen te një sulm i drejtpërdrejtë ndaj Federatës Ruse – në këtë rast po flasim për Kaliningradin, dhe ndoshta edhe për territore të tjera – çështja e vendosjes nga Federata Ruse të të gjitha armëve në dispozicion të vendit tonë do të jetë, sigurisht, në mënyrë të pashmangshme dhe menjëherë në rendin e ditës. Kjo është e pashmangshme.”

Komentet, siç njofton Reuters, vijnë pas një note diplomatike ruse që NATO-ja tha se e mori këtë javë, ku paralajmërohej se Moska do të ishte gati të përdorte armë bërthamore nëse aleanca do të tentonte të izolonte Kaliningradin. Sekretari i përgjithshëm Mark Rutte u përgjigj se NATO-ja është aleancë mbrojtëse dhe se kërcënimet bërthamore nuk ndihmojnë.

Putin tha se Rusia nuk kishte zgjedhje tjetër veçse të niste luftën në Ukrainë për të mbrojtur sigurinë e saj, duke theksuar se Moska nuk ka plane të sulmojë asnjë vend evropian dhe dëshiron të bashkëjetojë në paqe. Ai pranoi se Franca dhe Britania janë fuqi bërthamore, por shtoi: “Askush tjetër nuk zotëron llojin e armëve që Rusia ka sot. Kjo është avantazhi ynë konkurrues.”

Lideri rus u ndal edhe te rreziku i përshkallëzimit: “Duhet ta kuptojmë se momenti kur asgjë nuk mund të ndryshohet më mund të vijë shumë shpejt dhe papritur për të gjithë… Kjo është një rrugë drejt buzës së humnerës.”

Ai u shpreh gati për një takim trilateral me presidentin kinez Xi Jinping dhe presidentin amerikan Donald Trump, nëse hartohet një axhendë e duhur. Ndërkohë, Putin përjashtoi mundësinë e ndalimit të sulmeve ruse ndaj objektivave ukrainase në zonën e Detit të Zi, por pranoi se sulmet ukrainase ndaj rafinerive të naftës në Rusi i kanë kushtuar vendit të tij 1% të PBB-së, dhe tha se Moska nuk po planifikon “nesër” të sulmojë fabrikat e armëve në Evropë që furnizojnë Ukrainën.