Putin: Oferta ruse për të mbajtur uraniumin e Iranit mbetet ende në fuqi

Presidenti rus Vladimir Putin ka deklaruar se oferta e mëparshme e Moskës për të marrë uraniumin e pasuruar të Iranit — nëse hiqet nga vendi si pjesë e një marrëveshjeje të ardhshme paqeje me SHBA-në — mbetet ende në fuqi, siç njofton Al Jazeera.

Duke folur në Moskë në forumin Valdai, Putin tha se shpreson që Ngushtica e Hormuzit të hapet për anijet ndërkombëtare dhe se sanksionet ndaj Iranit të hiqen përfundimisht. Deklarata vjen ndërsa Teherani dhe Uashingtoni vazhdojnë shkëmbimet e ashpra në terren, por edhe ndërmjetësimet përmes Katarit.

Oferta ruse për uraniumin shihet si një nga çelësat e mundshëm të një marrëveshjeje diplomatike: largimi i materialit bërthamor nga Irani do t’i jepte Uashingtonit garancinë që Teherani nuk po shkon drejt armës bërthamore, ndërkohë që do t’i linte Iranit rrugëdalje pa humbje fytyre.

Moska, e cila ka forcuar partneritetin me Teheranin gjatë luftës, po pozicionohet gjithnjë e më shumë si ndërmjetëse mes palëve, përkrah Katarit dhe Kinës. Irani ka deklaruar vazhdimisht se programi i tij bërthamor është paqësor, ndërsa Perëndimi dyshon për qëllimet e pasurimit të uraniumit.