Qendra Kennedy paralajmëron falimentimin nëse emri i Trump nuk rikthehet në ndërtesë

Një paralajmërim i fortë për gjendjen financiare të Qendrës Kennedy ndodhet në një draft-rezolutë që i është shpërndarë bordit të trusteeve para një takimi të jashtëzakonshëm të martën. Në dokumentin e siguruar nga The New York Times dhe The Washington Post thuhet se qendra e famshme e arteve skenike në Uashington rrezikon “rrënim të sigurt financiar” brenda pak javësh — deri në pikën ku mund të mos jetë në gjendje të paguajë rrogat apo kontratat e mirëmbajtjes, duke rrezikuar falimentimin.

Sipas draftit, presidenti Donald Trump ka ofruar të mbledhë paratë e nevojshme për të shpëtuar institucionin — por vetëm me “njohje të duhur” të rolit të tij. Pa këtë, thuhet në rezolutë, ai as nuk do ta udhëheqë përpjekjen për shpëtimin financiar dhe as renovimin e planifikuar. “Trump attracts money,” i tha gazetës Times anëtari i bordit dhe aleati i vjetër i Trump, Paolo Zampolli. “So when Trump says donate to this place, everyone will donate.”

Paralajmërimi shënon fazën e fundit të marrjes graduale të kontrollit të institucionit artistik nga Trump, i cili emëroi besnikë të tij në bord dhe u zgjodh vetë kryetar vitin e kaluar. Që atëherë, artistët janë tërhequr nga eventet e planifikuara në qendër dhe shitjet e biletave kanë rënë ndjeshëm.

Emri i Trump në ndërtesë ka një histori të trazuar. Trump e vendosi emrin e tij në fasadën e jashtme të qendrës në dhjetor; një padi e kontestoi ligjshmërinë e veprimit dhe një gjyqtar vendosi që emri duhet të hiqej — shkronjat u hoqën në qershor. Në gusht, bordi i qendrës votoi sërish për ta rikthyer emrin dhe për ta mbyllur qendrën për një renovim shumëvjeçar, por bordi i tha një gjyqtari federal se nuk do të përpiqet ta rikthejë emrin deri më së voni më 8 tetor.

Sipas Post, trusteeve po u kërkohet të zgjedhin mes 10 mbishkrimeve nën emrin e ndërtesës — njëri prej tyre lexon: “Renovation Restoration and Endowment overseen by President Donald J. Trump and the Trump Kennedy Center Fund” — si dhe të miratojnë mbylljen e menjëhershme të ndërtesës kryesore, të cilën menaxhmenti e ka shpallur “të pasigurt për okupim të vazhduar”. Më 4 shtator, një copë suvaje tavani ra rreth 18 metra në Grand Foyer; askush nuk u lëndua.

CNN thotë se ka kontaktuar Qendrën Kennedy dhe Shtëpinë e Bardhë për koment, pa marrë ende përgjigje në momentin e publikimit.

Burimi: CNN