Milatoviq mbërrin në Zagreb, me Milanoviqin merr pjesë në Takimet e Luçindanit

Presidenti i Malit të Zi, Jakov Milatoviq, mbërriti të shtunën në Zagreb, ku së bashku me presidentin e Kroacisë, Zoran Milanoviq, merr pjesë në Takimet tradicionale të Luçindanit, siç njoftoi kabineti i presidentit malazez.

Sipas raportimit të RTCG-së, këto takime mbledhin pjesëtarë të diasporës malazeze dhe miq të Malit të Zi, me qëllim ruajtjen e identitetit kulturor dhe të traditës, si dhe forcimin e lidhjeve me atdheun. Të dy presidentët pritet t’u drejtohen pjesëmarrësve.

Gjatë qëndrimit në Zagreb, siç njofton CdM, vëmendje e veçantë do t’u kushtohet forcimit të marrëdhënieve dypalëshe, bashkëpunimit rajonal dhe perspektivës evropiane të Malit të Zi.

Vizita në Zagreb është pjesë e vizitës dy-ditore të punës të presidentit Milatoviq në Kroaci dhe Slloveni. Nesër, më 1 nëntor, ai do të udhëtojë në Lubjanë, ku do të takohet me presidenten e Sllovenisë, Nataša Pirc Musar.

Bisedimet me Milanoviqin dhe Pirc Musar, sipas kabinetit të presidentit, do të përqendrohen te bashkëpunimi rajonal në prag të Samitit të liderëve të Procesit Bërdo-Brioni, si dhe te përparimi i Malit të Zi drejt anëtarësimit të plotë në Bashkimin Evropian.