Rama: Hija e vjehrrit më të famshëm në botë dhe yshtja e algoritmit nga fuqitë e huaja, e bën protestën globale

Kryeministri Edi Rama akuzoi ndërhyrjen e fuqive të huaja përmes algoritmeve si dhe “rrëmbimi” i protestës qytetare nga persona që janë bërë “mish për top” të armiqve e kthyen protestën e bukur të flamingove në protestën e “korbave” që sot dëmtojnë vendin përmes të pavërtetave.

Në mbledhjen e grupit parlamentar të PS-së, Rama tha se kombinimi i disa elementëve, që nga përfshirja e emrit të dhëndrit të Trump si investues e deri te rrjetet sociale, i thanë protestës jehonë globale.

“Fati i kohës së kanaleve sociale ku noton sot bota bëri të vetën. Zvërneci dha videon virale, flamingoja dha simbolin magjepsës, një figurë e njohur ndërkombëtarisht solli magnetin global dhe algoritmi, i nxitur nga ushtallarët e ndërhyrjes në punët e vendeve të tjera, bëri pjesën tjetër. Me një shkrepëse të ndezur, zjarri u përhap anembanë botës.”

Sipas Ramës, protesta u nis nga qytetarë të angazhuar për mbrojtjen e mjedisit, por më pas u përdor nga aktorë të tjerë, ndërsa vëmendjen e përqendroi te ajo që e cilësoi si ndërhyrje të huaja në debatin publik përmes rrjeteve sociale.

“Zemra e protestës ishin njerëzit e zakonshëm të vendit dhe përgjigjja për ta duhet të jetë e jona. Ata nuk e krijuan këtë situatë, por protesta u rrëmbye. Tani që zemra e protestës ka ikur, ka mbetur mish për top për armiqtë dhe dashakeqësit e huaj të Shqipërisë. Në radhë të parë për ata shtetërorë që lëshojnë re të zeza masive përmes klikimeve false. Qëllimi i tyre është rrënimi i besimit, që shqiptarët të mos i besojnë më askujt – as shtetit, as drejtësisë, as mediave, as Europës, sepse një vend pa besim është i pambrojtur dhe një demokraci pa besim është një shesh për çdo përshesh”, tha Rama.