Rama takim me Tsipras: Zgjidhja e çështjeve të lëna pezull në frymën e respektit reciprok

Bashkëpunimi bilateral në projekte të përbashkëta dhe zgjidhja e çështjeve të lëna pezull ishin në fokus të takimit dypalësh të Kryeministrit Edi Rama dhe homologut të tij grek, Alexis Tipras, në selinë e Organizatës së Kombeve të Bashkuara në Nju Jork.

Siç mësohet nga mediat helene, Kryeministri shqiptar dhe ai grek, kanë diskutuar fillimisht për projektet me rëndësi që lidhin dy vendet.

Takimi është bërë i ditur edhe nga zyra e shtypit e qeverisë greke, ku thuhet se “kryeministri Tsipras theksoi se Athina zyrtare është në anën e Shqipërisë në rrugën drejt Bashkimit Evropian.
Kryeministri Tsipras, – thekson njoftimi, – nënvizoi rëndësinë e gjetjes së gjuhës së përbashkët  për çështjet e pazgjidhura midis dy vendeve, siç është ajo e Detit, mbi bazën e të drejtës ndërkombëtare dhe në frymën e respektit të ndërsjellë.

Në të njëjtën linjë, kryeministri Tsipras theksoi nevojën për të respektuar të drejtat e minoritetit kombëtar grek dhe respektimin e të drejtave fetare, duke theksuar në këtë kontekst rolin e rëndësishëm të kryepeshkopit Anastas Janullatos.

Pjesë e diskutimit mes dy kryeministrave ishte edhe perspektiva për bashkëpunim bilateral veçanërisht në sferat ekonomike dhe tregtare.

Edhe këshilltari për mediat i kryeministrit Rama, Endri Fuga ka postuar në Twitter një foto nga ky takim. “Takimi i parë shumë miqësor i kryeministrit Edi Rama me kryeministrin greke”, – shkruan Endri Fuga.

Shefi i qeverisë shqiptare i ka bërë ftesë kryeministrit Tsipras për një vizitë zyrtare në Tiranë.