Rasti Mazonakis: avokatët heqin dorë nga mbrojtja e mjekes, vijojnë vetëm me bashkëshortin

Me një deklaratë me shkrim, avokatët Nikos Agapinos dhe Tellos Agapinos, të cilët mbronin çiftin e mjekëve të arrestuar për vdekjen e këngëtarit Giorgos Mazonakis, bënë të ditur se heqin dorë nga mbrojtja e mjekes së akuzuar, duke përfaqësuar tashmë vetëm mjekun tjetër të akuzuar. Njoftimi u publikua të hënën në mbrëmje, siç raporton Hellasjournal.

«Avokatët mbrojtës të mjekut Ilias Theodoropoulos, për arsye thjesht ligjore, bëjnë të ditur se e kufizojnë përfaqësimin e tyre tek ky klient, duke hequr dorë nga mbrojtja e bashkëshortes së tij, e akuzuara tjetër. Ky kufizim është i domosdoshëm nga pikëpamja procedurale, për shkak të diferencimit faktik të mbrojtjes së dy të akuzuarve. Nëse do të gjykohet e përshtatshme, arsyet do të zhvillohen hollësisht» — thuhet në deklaratën e dy avokatëve, sipas raportimit të Hellasjournal, me informacione nga agjencia shtetërore greke APE-MPE.

Më herët gjatë së hënës, një tjetër punonjëse e klinikës në rrugën Karneadou, ku humbi jetën këngëtari, kaloi pragun e zyrës së hetuesit. Bëhet fjalë për një infermiere 61-vjeçare në pension, e cila punonte me gjysmë norme në klinikën e dy mjekëve të paraburgosur, Ioanna Gakas dhe Ilias Theodoropoulos. Sipas informacioneve, dëshmia e saj pritet t’i sjellë elementë të rëndësishëm hetimit: ajo thuhet se ka ndryshuar deklaratën e saj para-hetimore, duke thënë se kishte qenë në klinikë dhe nuk ishte larguar në orën 16:15, siç kishte deklaruar më parë, si edhe ka përshkruar panikun që mbizotëronte në ato momente, kur mjekja e paraburgosur thirri të gjitha punonjëset në dhomën ku ndodhej Giorgos Mazonakis.

Dy mjekët akuzohen për vrasje me dashje të mundshme nëpërmjet mosveprimit, pas vdekjes së këngëtarit gjatë një procedure plazmafereze në klinikën e tyre në Kolonaki, dhe ndodhen në paraburgim. Hetimi vijon, ndërsa hetuesi ka thirrur për dëshmi edhe persona të tjerë që kanë pasur lidhje me klinikën.