F-35 për Turqinë, gjithnjë e më larg: Athina thotë se Ankaraja nuk i plotëson kushtet
Një burim i lartë diplomatik grek paralajmëron se Turqia nuk do të rikthehet në programin e avionëve luftarakë F-35 pa dëshmuar se nuk zotëron më sistemin rus S-400, ndërsa kërcënimi i luftës ndaj Greqisë e mban atë larg edhe nga mekanizmat europianë të mbrojtjes.
Turqia nuk do të rikthehet në programin e avionëve luftarakë F-35: ky ishte mesazhi i një burimi të lartë diplomatik grek, siç njofton eKathimerini. Sipas të njëjtit burim, Ankaraja duhet së pari të provojë se nuk zotëron më sistemin rus të mbrojtjes ajrore S-400.
Rruga ligjore amerikane mbetet shumë kufizuese, thekson burimi diplomatik për eKathimerini: për rikthimin e Turqisë duhen ndryshime në legjislacionin amerikan, përfshirë Aktin e Autorizimit të Mbrojtjes Kombëtare.
Turqia u përjashtua nga programi F-35 pas blerjes së S-400-ve ruse në 2019, një vendim që vazhdon të rëndojë mbi marrëdhëniet e saj të mbrojtjes me Shtetet e Bashkuara.
I njëjti burim ka theksuar se Turqia nuk do të marrë rol në mekanizmat europianë të mbrojtjes për sa kohë mban kërcënimin e luftës (“casus belli”) ndaj Greqisë.
Greqia ndërkohë pret avionët e parë F-35 në 2028 – fillim të viteve 2030, me 20 avionë të porositur dhe opsion deri në 40, duke forcuar kështu avantazhin e saj ajror në rajon.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.