Reagime nga politikanët shqiptarë të Malit të Zi pas dënimit në Hagë të ish-krerëve të UÇK-së: “Vendim i dhimbshëm për të gjithë shqiptarët”

Dhomat e Specializuara të Kosovës në Hagë shpallën sot vendimin e shkallës së parë: ish-presidenti i Kosovës Hashim Thaçi dhe ish-kryetari i Kuvendit Jakup Krasniqi u dënuan me nga 25 vjet burg, ish-kryetari i PDK-së Kadri Veseli me 18 vjet dhe ish-deputeti Rexhep Selimi me 13 vjet burg për krime lufte të kryera në Kosovë dhe Shqipëri në vitet 1998–1999.

Nënkryetari i Kuvendit të Malit të Zi dhe deputeti i Forumit Shqiptar, Nikollë Camaj, e quajti vendimin “moment të dhimbshëm për Kosovën dhe gjithë popullin shqiptar”. Ai shprehu bindjen se vendimi i shkallës së parë “nuk mund të jetë përfundimtar” dhe se “rruga drejt drejtësisë vazhdon”.

Camaj theksoi se në këtë rrugë pret dhe llogarit mbështetjen e Shteteve të Bashkuara të Amerikës, “partnerit dhe mikut kryesor në procesin e çlirimit dhe ndërtimit të shtetit të Kosovës”, duke shtuar se UÇK-ja ishte “ushtri çlirimtare që u ngrit për të mbrojtur popullin e Kosovës, e jo për të kryer krime ndaj të tjerëve”. Ai përfundoi: “Ta ruajmë dinjitetin, kujtesën dhe unitetin”.

Edhe deputeti i Forcës, pjesë e koalicionit Aleanca Shqiptare, Ilir Çapuni, tha se vendimi është i dhimbshëm për familjet e të dënuarve, Kosovën dhe të gjithë shqiptarët. Ai kërkoi “veprim të qartë e të planifikuar”: mbështetje të plotë ligjore në procedurat e ankimimit, hapjen, ruajtjen dhe sistemimin profesional të arkivave, dokumentimin e krimeve të Serbisë në Kosovë, forcimin e diplomacisë dhe kërimit shkencor, si dhe një strategji të përbashkët kombëtare për ruajtjen e kujtesës historike.

“Jo reagime që ndryshojnë nga dita në ditë, jo zhurmë pa rezultat”, shkroi Çapuni në Facebook, duke përfunduar: “Çështja e drejtë e lirisë kërkon edhe përgjegjësi të drejtë, në mënyrë që e vërteta të mbrohet”.

Burimi: Vijesti