REM: Në programet e N1-it dhe Nova S u vunë re përmbajtje në kundërshtim me heshtjen zgjedhore

Në programet e televizioneve N1 dhe Nova S janë vënë re sot përmbajtje programore në kundërshtim me detyrimet gjatë heshtjes zgjedhore, njoftoi Rregullatori i Mediave Elektronike (REM) i Serbisë, siç transmeton agjencia Tanjug.

Sipas njoftimit të REM-it, përmbajtjet e diskutueshme janë transmetuar më 23 tetor, në periudhat 07:53–07:55 dhe 08:02–08:18 në emisionin “Probudi se” të Nova S, si dhe në periudhat 08:03–08:04 në emisionin “Novi dan” të N1-it dhe 08:21–08:22 në lajmet e këtij televizioni. REM-i kujton se programi zgjedhor nuk mund të shfaqet 48 orë para ditës së zgjedhjeve dhe në ditën e zgjedhjeve deri në mbylljen e vendvotimeve.

Shërbimi profesional i REM-it, siç thuhet në njoftim, i ka njoftuar redaktorët e të dy televizioneve për përmbajtjet e vërejtura, duke u tërhequr vëmendjen për detyrimin që të veprojnë në përputhje me rregullat që rregullojnë sjelljen e ofruesve të shërbimeve mediale gjatë fushatës zgjedhore, përfshirë respektimin e heshtjes zgjedhore.

REM-i thekson se do të vazhdojë të ndjekë programet e ofruesve të shërbimeve mediale gjatë heshtjes zgjedhore dhe të marrë masat e parashikuara me ligj. Heshtja zgjedhore në Serbi ka hyrë në fuqi në mesnatë, para zgjedhjeve të parakohshme parlamentare që mbahen të dielën, më 25 tetor.