Rikthehen mbledhjet qeveritare Shqipëri-Kosovë, Hoxha: Po punojmë për takimin e radhës, po analizojmë mbi 60 marrëveshjet
Pas dy vitesh pa një mbledhje të përbashkët, qeveritë e Shqipërisë dhe të Kosovës po punojnë për të caktuar takimin e radhës. Siç njofton Shqiptarja.com, ministri i Jashtëm Ferit Hoxha tha për Report Tv se data mbetet ende për t’u vendosur, ndërsa kriza politike në Kosovë e kishte vështirësuar organizimin e mbledhjes.
“Ne kemi zhvilluar tetë mbledhje mes qeverive. Natyrisht që nuk ka pasur mbledhje në këto dy vitet e fundit, sepse në Kosovë ka pasur një proces zgjedhor. Ne po punojmë për të gjetur momentin e duhur për mbledhjen e radhës”, theksoi Hoxha, duke shtuar se marrëdhëniet mes dy vendeve janë institucionalisht të konsoliduara dhe ndiqen në të gjitha nivelet.
Sipas tij, të dyja palët kanë nënshkruar mbi 60 marrëveshje dhe po analizojnë cilat janë zbatuar, cilat janë në zbatim e sipër dhe cilat kanë mbetur prapa, në mënyrë që të kenë një pasqyrë të plotë se ku janë, çfarë kanë bërë dhe çfarë u mbetet ende për të bërë.
Hoxha theksoi se Kosova ka tashmë një qeveri me mandat të qartë katërvjeçar dhe se marrëdhënia e ngushtë mes dy vendeve nuk është ndërprerë asnjëherë, as gjatë këtyre dy viteve. Sipas tij, situata tani lejon planifikim më të mirë dhe më të qartë për hapat e radhës.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.