Rodri nuk përjashton asgjë: Unë te Real Madridi? Do ta shohim pas Botërorit

Mesfushori i Manchester City dhe fituesi i “Topit të Artë”, Rodri, ka komentuar për herë të parë zërat që e lidhin me një transferim te Real Madridi, pa dhënë garanci për qëndrimin e tij në Angli.

Duke folur për “MARCA” gjatë grumbullimit të kombëtares spanjolle për Botërorin, 29-vjeçari u shpreh: “Zërat për Real Madridin? Janë pjesë e futbollit. Personalisht jam i përqendruar të bëj liderin për kombëtaren, ky është rrugëtimi im. I kuptoj këto zëra, por nuk kam ndërmend të humbas kohë me to. Do ta shohim pas Botërorit”.

Deklarata ka tërhequr vëmendje, pasi Rodri nuk e përjashtoi mundësinë e një largimi nga City, ndërsa kontrata e tij me klubin anglez skadon në vitin 2027. Mesfushori foli edhe për gjendjen e tij fizike: “Vij i freskët pas një sezoni që në aspektin personal ishte i mirë, edhe pse si skuadër nuk arritëm gjithçka që dëshironim. Kam më pak ritëm se në vitin 2024, por nga ana tjetër kam edhe më pak ndeshje në këmbë”.

Për shanset e Spanjës në Botëror, ai shtoi: “Është kompliment të konsiderohesh mes favoritëve, por kjo duhet treguar në fushë. Parashikimet vlejnë pak. Botërori është shumë i gjatë dhe kërkues. Jemi të gjithë në gjendje shumë të mirë dhe të entuziazmuar për atë që na pret”.