ROMË – Wadephul takohet me Tajanin, në fokus zgjerimi i BE-së dhe siguria e Evropës

– Ministri gjerman i Punëve të Jashtme, Johann Wadephul u takua sot në Romë me homologun e tij italian, Antonio Tajani, për të diskutuar çështje që lidhen me të ardhmen e Bashkimit Evropian dhe sigurinë e Evropës.

Në qendër të bisedimeve ishte zgjerimi i Bashkimit Evropian në Ballkanin Perëndimor.

Gjermania dhe Italia mbështesin përshpejtimin e procesit të anëtarësimit të vendeve të rajonit në BE.

Para vizitës në Romë, Wadephul tha se Gjermania dhe Italia duhet të punojnë së bashku, për t’i afruar më shpejt vendet e Ballkanit Perëndimor me Bashkimin Evropian.

Ai e cilësoi zgjerimin e BE-së në këtë rajon, si një çështje shumë të rëndësishme për Evropën dhe tha se vendet që bëjnë përparim në reformat e kërkuara, duhet të shohin përparim edhe në procesin e anëtarësimit.

Wadephul theksoi gjithashtu se vendet e Ballkanit Perëndimor duhet të vazhdojnë reformat, veçanërisht në shtetin e së drejtës, luftën kundër krimit të organizuar dhe korrupsionit, si dhe bashkëpunimin mes tyre.

Një tjetër temë e diskutimeve ishte forcimi i ekonomisë evropiane.

Gjermania dhe Italia janë dy nga vendet kryesore industriale të Evropës dhe duan të bashkëpunojnë, për ta bërë ekonominë evropiane më konkurruese në tregjet ndërkombëtare.

Sipas Ministrisë së Jashtme gjermane, të dyja vendet përfaqësojnë së bashku rreth 40% të prodhimit industrial të Evropës.

Berlini dhe Roma kërkojnë gjithashtu një Bashkim Evropian më të aftë, për të marrë vendime dhe për të vendosur prioritetet e tij ekonomike dhe të sigurisë.

Në bisedime u përfshi edhe siguria evropiane dhe mbështetja për Ukrainën.

Ministria e Jashtme gjermane bëri të ditur para takimit, se mbështetja për Ukrainën në luftën kundër Rusisë do të ishte një nga temat e vizitës së Wadephul në Itali.

Takimi u zhvillua në kuadër të vizitës së Wadephul në Itali, pas pjesëmarrjes së tij në takimin e ministrave të Jashtëm të Procesit të Berlinit në Malin e Zi.

Gjermania dhe Italia festojnë këtë vit 75-vjetorin e marrëdhënieve diplomatike dhe kanë deklaruar synimin, për të forcuar bashkëpunimin e tyre në çështjet evropiane, ekonomike dhe të sigurisë. /