Rreth 30 miliardë lekë nga të ardhurat personale në buxhet

Të ardhurat e mbledhura në buxhetin e shtetit nga tatimi mbi të ardhurat personale llogariten 29.5 miliardë lekë.

Edhe pse të ardhurat e mbledhura nga kjo taksë rezultojnë më të larta me rreth 438 milion lekë krahasuar me 11-mujori i vitit 2016, ato janë 4% më pak se plani.

Ndikim në shumën e arkëtuar nga kjo taksë ka pasur reduktimi i pagesës së tatimit në burim për shitjet e pasurive të paluajtshme për shkak të “ligjit të rivlerësimit”.

Sipas ligjit, shitja e një prone i nënshtrohet taksës 15% mbi diferencën e çmimit të shitjes, me atë të blerjes. Meqenëse shumë prona në Shqipëri janë blerë në kohën kur çmimet ishin shumë të ulëta, Ministria e Financave u mundësoi qytetarëve të rivlerësojnë këto prona, duke paguar vetëm 2% , për një periudhë 9 mujore shtator 2016-qershor 2017.

Gjatë kësaj periudhe rreth 60 mijë aplikime janë kryer ne zyrat e shërbimit te administratës publike në rang kombëtar, ku Tirana ka mbajtur peshën kryesore.