Rrëzohet kërkesa e PD për debat për masën ndaj kreut të SHISH, deputetët bllokojnë foltoren

Mazhoranca rrëzoi kërkesën e Partisë Demokratike për ndryshimin e rendit të ditës dhe zhvillimin e një debati në Kuvend lidhur me rastin e ish-kreut të SHISH, Vlora Hyseni.

Deputetët e opozitës rrethuan foltoren, ndërsa seanca u ndërpre për 10 minuta.

Para nisjes së seancës Partia Demokratike kërkoi ndryshimin e rendit të ditës në Kuvend, pas zhvillimeve të fundit lidhur me arrestimin e ish-drejtoreshës së SHISH, Vlora Hysenit.

Në një kërkesë drejtuar kryetarit të Kuvendit, opozita kërkoi që të hiqen nga axhenda interpelancat me ministrat Sofjan Jaupaj dhe Mirela Kumbaro.

Në vend të tyre, PD kërkoi zhvillimin e një debati me kryeministrin Edi Rama lidhur me situatën në Shërbimin Informativ të Shtetit dhe zhvillimet pas masës së arrestit në shtëpi të ish-drejtoreshës së këtij institucioni.