Rriten çmimet e naftës, skepticizëm për marrëveshjen SHBA-Iran

Çmimet e naftës janë rritur në tregjet ndërkombëtare, ndërsa investitorët po shfaqen gjithnjë e më skeptikë për një përparim të mundshëm në bisedimet mes SHBA-së dhe Iranit për t’i dhënë fund konfliktit.

Sipas raportimeve, negociatat mbeten të bllokuara për shkak të mosmarrëveshjeve mbi rezervat e uraniumit të Teheranit, si edhe çështjen e bllokadës në Ngushticën e Hormuzit, një nga korridoret më të rëndësishme të transportit të naftës në botë.

Nafta bruto Brent u rrit me 2.38 dollarë, ose 2.3%, duke arritur në 104.96 dollarë për fuçi në orët e para të së premtes sipas orës GMT. Ndërkohë, nafta bruto amerikane West Texas Intermediate (WTI) u rrit me 1.73 dollarë, ose 1.8%, duke u tregtuar në 98.08 dollarë për fuçi.

Rritja vjen pas rënies me rreth 2% të të dy standardeve të naftës gjatë së enjtes, kur çmimet prekën nivelin më të ulët në afro dy javë.