Rritet ndjeshëm prodhimi i energjisë, shtohen eksportet në rajon

Gjatë tre muajve të parë të vitit, Shqipëria ka prodhuar mbi 3 teravat orë energji elektrike, rreth 70% më shumë krahasuar me të njëjtën periudhë të vitit 2025.

Sipas një raporti të Komunitetit të Energjisë, kjo rritje është nxitur kryesisht nga reshjet e shumta, që kanë rritur prodhimin nga hidrocentralet në rreth 3.27 teravat orë.

Rritja e prodhimit ka sjellë edhe shtim të eksporteve drejt vendeve fqinje si Greqia, Kosova dhe Mali i Zi. Shqipëria ka regjistruar një rritje neto të eksporteve prej rreth 1.2 teravat orë krahasuar me një vit më parë.

Struktura e prodhimit, e bazuar pothuajse tërësisht në burime hidrike, e bën energjinë shqiptare më konkurruese në tregjet rajonale. Gjithashtu, kjo energji nuk i nënshtrohet kostove shtesë të mekanizmit europian të karbonit, duke i dhënë vendit një avantazh krahasues.

Megjithatë, raporti paralajmëron për sfida në stabilitetin e rrjetit dhe koordinimin rajonal për shkak të rritjes së flukseve ndërkufitare.