Rritet në 22 numri i viktimave nga sulmi rus ndaj Kievit

Numri i të vdekurve nga sulmi i fundit rus me raketa dhe dronë ndaj Ukrainës është rritur në 22, sipas autoriteteve ukrainase.

Kryeqyteti Kiev ishte objektivi kryesor i bombardimeve, ku humbën jetën 15 persona dhe 56 të tjerë mbetën të plagosur, bëri të ditur kreu i administratës ushtarake të qytetit, Tymur Tkachenko.

Ndërkohë, në rajonin e Kievit u raportuan edhe shtatë viktima të tjera dhe 29 të plagosur, sipas Shërbimit Shtetëror të Emergjencave të Ukrainës.

Ekipet e shpëtimit vijojnë operacionet në zonat e goditura, ndërsa autoritetet po vlerësojnë dëmet e shkaktuara nga sulmi.