Ish-ministri Damjan Mančevski futet në biznesin e data-centreve: bashkëpronar i kompanisë së re “Orion AI Factory”

Damjan Mančevski, ish-ministri i Shoqërisë Informatike dhe Administratës dhe ish-nënkryetar i SDSM-së, po hyn në biznesin e data-centreve në rajon. Ai është një nga tre pronarët e kompanisë së sapoformuar "Orion AI Factory" në Maqedoninë e Veriut, e cila synon operimin e data-centreve në Ballkan dhe më gjerë.

Dy pronarët e tjerë të kompanisë janë "Orion Telekom Holdings" nga Amsterdami dhe "Hemski Inžiniring" – firma e biznesmenit Gorjan Maksimovski, i cili zotëron prona të mëdha të patundshme në kompleksin e ish-"OHIS"-it në Shkup.

"Orion" është një operator telekomi me 25 vjet përvojë në Serbi, ku ofron të gjitha shërbimet telekomunikuese, përveç telefonisë mobile. Kompania ka data-centrin e vet në Beograd dhe synon të operojë data-centre si kompani partnere e gjigantit amerikan "Nvidia". Vitet e fundit, "Orion" po zgjerohet drejt inteligjencës artificiale dhe teknologjive të tjera.

Vetë Mančevski e ka njoftuar angazhimin e tij në rrjetet sociale dhe në një podcast, ku ka deklaruar se planet e zgjerimit përfshijnë pesë deri në gjashtë shtete të rajonit dhe të Europës Lindore. Maqedonia është ndër tregjet e mundshme, por nuk është fokusi parësor i kompanisë së re.

E hapur mbetet pyetja nëse "Orion AI Factory" ka ndonjë lidhje me projektin e kontestuar të data-centrit në Pehçevë, ku këshilli komunal refuzoi në gusht iniciativën për dokumentacionin urbanistik, ndërsa investitorët mbeten anonimë. Nuk ekziston asnjë dokument publik që e lidh kompaninë e re me atë projekt dhe nuk ka informacion zyrtar për lokacionin e projektit të parë të saj në Maqedoni.

Burimi: mkinformer.com