Rugova: Nëse nuk votohet Thaçi për president, prishet marrëveshja
Pozita e presidentit mund të jetë shkaktari që do ta qonte Kosovën në zgjedhje të parakohshme.
Dy partitë e mëdha që janë në koalicion, PDK dhe LDK, e kanë marrëveshjen që Thaçi më 2016 të vendosen në zyrën e presidentit për ta ushtruar detyrën e të parit të shtetit.
Mirëpo tre deputetë të LDK-së, Arben Gashi, Vjosa Osmani dhe Adem Salihaj, janë shprehur publikisht që nuk do ta votojnë liderin e PDK-së Hashim Thaçin për president.
Nënkryetari i LDK-së, Haki Rugova ka thënë për Indeksonline se është një marrëveshje që duhet të respektohet, që sipas tij duhet të votohet Thaçi për president. Rugova nuk ka pranuar të flas për deputetët që janë kundër Thaçit, duke preferuar që të pyeten deputetët.
Sipas Rugovës, nëse nuk votohet Thaçi për president, prishet marrëveshja.
“Këtë pyetje duhet t’ia bëni deputetëve sepse unë s’jam deputet. Ne e kem një marrëveshje të shkruar dhe unë jam i prirur ta respektoj atë. Nëse ekziston një marrëveshje që ne e kemi pranuar si të tillë, atëherë ish dashur të votohet. E nëse nuk votohet atëherë prishet marrëveshja. S’kem çka bëjmë”, ka thënë Rugova.
