Rusët godasin sërish në mëngjes një qendër tregtare në Zaporizhzhia, shpërthen zjarr

Trupat ruse goditën sërish mëngjesin e së hënës një qendër tregtare në qytetin e Zaporizhzhias, ku pas goditjes shpërtheu zjarr, siç njofton Ukrinform, duke iu referuar ushtruesit të detyrës së kreut të Administratës Ushtarake Rajonale të Zaporizhzhias, Mykhailo Semikin.

“Armiku e sulmoi Zaporizhzhian në mëngjes. Goditja ra mbi ndërtesën e qendrës tregtare, e cila tashmë nuk punonte”, njoftoi Semikin në Telegram, sipas Ukrinform.

Pas goditjes në ndërtesë shpërtheu zjarr. Sipas të dhënave paraprake, nga ky sulm i mëngjesit nuk ka persona të plagosur.

Goditja e mëngjesit vjen pas sulmit të natës mbi të njëjtin qytet, nga i cili numri i të plagosurve u rrit në katër — dy gra të moshës 22 dhe 30 vjeç dhe dy burra të moshës 40 dhe 61 vjeç — ndërsa u dëmtuan shtëpi private, automjete dhe një ndërtesë tregtare.