SAANA – Rebelët Houthi akuzojnë Arabinë Saudite për sulmin në aeroport

KAJRO, 13 korrik /ATSH-DPA/ – Tensionet në Jemen janë rritur sërish pasi Aeroporti Ndërkombëtar i Sanaas u godit sot nga sulme ajrore, në një incident që rrezikon të minojë periudhën e qetësimit relativ të konfliktit.

Rebelët Houthi, të mbështetur nga Irani, akuzuan Arabinë Saudite për sulmin, ndërsa qeveria e Jemenit deklaroi se objektivi ishte pista e aeroportit për të penguar uljen e një avioni iranian.

Zëdhënësi ushtarak i rebelëve Houthi, gjeneralbrigade Yahya Saree, tha se sulmet goditën pistat e aeroportit të Sanaas.

Ai e cilësoi këtë veprim si fundin e fazës së shpërshkallëzimit të luftës civile në Jemen dhe paralajmëroi se grupi do të përgjigjet me kundërveprime.

Nga ana tjetër, qeveria jemenase deklaroi se kishte paralajmëruar më herët se do të përdorte “të gjitha mjetet në dispozicion” për të ndaluar, sipas saj, shkeljet e hapësirës ajrore të Jemenit nga Irani dhe rebelët Houthi.

Sipas autoriteteve, goditja e pistës kishte për qëllim të pengonte uljen e avionit iranian.

Burime nga aeroporti i Sanaas thanë se avioni iranian kishte fikur sistemet e gjurmimit gjatë fluturimit, duke u zhdukur nga platformat e monitorimit ajror.

Ai u zbulua për herë të fundit mbi qytetin Dhamar, në jug të Sanaas, ndërsa raportime të mëvonshme pretenduan se avioni kishte zbritur në qytetin bregdetar të Hodeidahut, në perëndim të vendit./  /Ad.Ad./ a.jor.