Drejtori i Kombëtares së Kosovës, Muharrem Sahiti, ka folur për rrugëtimin e futbollit kosovar pas pranimit në UEFA e FIFA, pritshmëritë e mëdha të opinionit, rolin e drejtuesve të FFK-së dhe objektivin aktual të Dardanëve.

I ftuar në podcastin “Pa Protokoll” të TV Gjilanit, Sahiti theksoi se pas pranimit të Kosovës, pritshmëritë e publikut u rritën shumë shpejt, ndonëse sipas tij, ndërtimi i një Kombëtareje konkurruese kërkon kohë, punë dhe investim të vazhdueshëm.

“Në futboll e fiton atë që investon, jo atë që e dëshiron”, ka thënë Sahiti, duke shtuar se Kosova ka ndërtuar një projekt afatgjatë, i cili synon ta çojë Kombëtaren drejt rezultateve të mëdha ndërkombëtare.

Ai u ndal edhe te ndeshja ndaj Maqedonisë së Veriut, e cila sipas tij ka mbetur peng për opinionin futbolldashës në Kosovë. Sahiti sqaroi se në atë periudhë, pandemia e kishte penalizuar rëndë Kosovën, pasi disa prej futbollistëve kryesorë nuk kishin mundur të udhëtonin për shkak të kufizimeve në rajonet ku luanin.

Sahiti përmendi rastet e Amir Rrahmanit, Vedat Muriqit dhe Milot Rashicës, duke thënë se mungesat e tyre nuk kishin të bënin me hezitim për të ardhur në Kombëtare, por me rrethana të jashtëzakonshme të pandemisë, lëndimeve dhe vendimeve të klubeve apo autoriteteve lokale.

“Por ne nuk u dorëzuam. Vazhduam me projektin dhe me dëshirën që Kosova duhet të arrijë objektivin e saj”, u shpreh ai.

Drejtori i Kombëtares foli edhe për përzgjedhësin aktual Franco Foda, duke thënë se angazhimi i tij është bërë me synim të qartë: kualifikimin e Kosovës në Kampionatin Evropian.

“Selektorin aktual, Fodën, e kemi angazhuar për ta realizuar këtë objektiv, që Kosova të kualifikohet në Kampionatin Evropian 2028”, deklaroi Sahiti.

Në këtë intervistë, Sahiti vlerësoi lart edhe rolin e Fadil Vokrrit në procesin e pranimit të Kosovës, duke e quajtur atë “lokomotivën” që i priu këtij rrugëtimi. Ai po ashtu foli me konsideratë për presidentin aktual të FFK-së, Agim Ademi, duke thënë se pas vdekjes së Vokrrit, Ademi e ka vazhduar punën në mënyrën më të mirë të mundshme.

Ai përmendi gjithashtu edhe rolin e Federatës Shqiptare të Futbollit dhe presidentit Armand Duka në procesin e pranimit ndërkombëtar të Kosovës, duke thënë se përmes tij FFK kishte arritur të krijonte kontakte të rëndësishme me federata të ndryshme evropiane dhe botërore.