Samiti BE-Ballkani Perëndimor mbahet më 25 nëntor në Bruksel

Liderët e Bashkimit Evropian dhe të vendeve të Ballkanit Perëndimor do të mblidhen më 25 nëntor në Bruksel, në një samit ku në fokus do të jenë procesi i integrimit evropian, reformat dhe forcimi i bashkëpunimit rajonal. Sipas Këshillit Evropian, takimi synon të riafirmojë rëndësinë strategjike të marrëdhënieve mes BE-së dhe Ballkanit Perëndimor, si dhe angazhimin për anëtarësimin e vendeve të rajonit në bllokun evropian.

BE-ja do të përfaqësohet nga presidenti i Këshillit Evropian, António Costa, dhe presidentja e Komisionit Evropian, Ursula von der Leyen.

Costa ka theksuar se anëtarësimi i Ballkanit Perëndimor mbetet një prioritet për Bashkimin Evropian, duke e cilësuar atë si një investim të rëndësishëm gjeopolitik në një periudhë sfidash ndërkombëtare. Sipas RTK, gjatë samitit, liderët pritet të diskutojnë reformat e nevojshme për përparimin e vendeve të rajonit drejt anëtarësimit, si dhe integrimin gradual të tyre në strukturat dhe politikat e BE-së.

Një tjetër çështje e rëndësishme do të jetë Plani i Rritjes për Ballkanin Perëndimor, me theks te zbatimi i mëtejshëm i tij dhe mundësitë për të përshpejtuar afrimin ekonomik të rajonit me Bashkimin Evropian.

Në agjendë do të përfshihen gjithashtu sfidat e përbashkëta, siguria dhe qëndrueshmëria në kushtet e zhvillimeve gjithnjë e më komplekse gjeopolitike. Takimi zhvillohet në kuadër të Agjendës Strategjike të Këshillit Evropian për periudhën 2024–2029. Samiti i fundit mes liderëve të BE-së dhe Ballkanit Perëndimor u mbajt në Mal të Zi, në qershor të vitit 2026.

Ende nuk ka komente. Bëhuni i pari që komenton.