Samiti i parë pa Britaninë, BE diskuton krizat dhe një ushtri të përbashkët

Udhëheqësit e Bashkimit Europian do të mblidhen në Bratislavë pa Britaninë e Madhe për të diskutuar mbi ekonominë, krizën e emigrantëve, sigurinë dhe masat e përballjes me këto probleme.

Takimit i parapriu një deklaratë e Presidentit të BE-së, Donald Tusk që kërkon një ‘vështrim më realist të problemeve të 1001 problemeve që ka unioni”.

“Bashkimi Europian duhet të bëjë një diagnozë reale mbi shkaqet që çuan në daljen e Britanisë së Madhe nga unioni dhe duhet të sigurojmë qytetarët tanë se kemi nxjerrë mesim nga ky vendim i britanikëve”, tha Tusk.

Ai bëri thirrje për më shumë unitet në adresimin e sfidave që po përballet sot BE, vendet e së cilës janë të përçara për masat për përballimin e fluksit të emigrantëve, sigurinë e kufijve dhe rigjallërimin e ekonomisë.

Samiti zhvillohet në Sllovaki, një prej vendeve të bllokut të qendrës dhe lindjes së Europës që kundërshton politikën e dyerve të hapura të Angela Merkel për refugjatët.

Për herë të parë në një samit do të flitet për një plan konkret për ngritjen e një force të përbashkët europiane, detyra kryesore e së cilës do të jetë ruajtja e kufijve të jashtëm të BE-së. Propozimi, që u njoftua tërthorazi edhe nga Jean-Claude Juncker ditën e mërkurë, mbështetet fuqimisht nga Gjermania dhe Franca.

Juncker kërkoi të mërkurën ngritjen e një shtabi të përbashkët ushtarak europian dhe forcim të bashkëpunimit në këtë fushë mes vendeve të BE-së.