Šćepanović: Drecuni, Tanaskovski dhe Medenica qëndronin bashkë në një banesë me arsenal armësh në Herceg Novi

Drejtori i Drejtorisë së Policisë, Lazar Šćepanović, deklaroi sot në një konferencë për shtyp se tre persona të kërkuar ndërkombëtarisht, Nikola Drecun, Andrej Tanaskovski dhe Miloš Medenica, qëndronin bashkë në një nga “štek-banesat” në Herceg Novi, ku u gjet një arsenal armësh. Siç njofton gazeta “Dan”, të tre personat ishin fshehur në të njëjtën banesë, e cila përdorej si strehë nga strukturat kriminale.

Sipas Šćepanovićit, policia dyshon se N.Z. dhe V.L. u kanë ofruar mbështetje logjistike dhe kanë ndihmuar në fshehjen e tre të kërkuarve. Sipas raportimit të portalit Najnovije.me, bëhet fjalë për Nemanja Zurovac dhe Vasilije Lakić, të cilët janë proceduar për rolin e tyre në strehimin e grupit.

Aksioni, siç sqaron gazeta “Dan”, është vazhdim i operacionit kundër grupeve kriminale me rrezikshmëri të lartë që nisi në fund të korrikut. Në kuadër të tij, policia arrestoi shtetasin e Maqedonisë së Veriut Andrej Tanaskovski, të kërkuar ndërkombëtarisht për vrasje në tentativë, posedim dhe mbajtje të paligjshme të armëve, si dhe falsifikim dokumentesh. Më pas u arrestuan edhe tre persona të tjerë: N.M. nga Nikšići, si dhe N.T. (49) dhe S.S. (40) nga Herceg Novi.

Gjatë kontrolleve në Herceg Novi, policia gjeti pushkë snajperi, pushkë automatike, një granatëhedhës dore “zolja” M80, një maskë silikoni, municion dhe lëndë eksplozive. Šćepanović tha se policia beson se me këtë aksion ka penguar planet e strukturave kriminale dhe ka parandaluar kryerjen e krimeve të rënda, duke kontribuar drejtpërdrejt në stabilitetin e vendit.

Siç njofton portali Najnovije.me, policia identifikoi dhe procedoi edhe anëtarët e tjerë të të njëjtit grup kriminal me rrezikshmëri të lartë: A.T. (2007), N.Z. (1997) nga Herceg Novi, V.L. (2003) nga Herceg Novi, si dhe Nikola Drecun (1993), person i kërkuar ndërkombëtarisht dhe i dyshuar për krimet më të rënda.