Seanca maratonë, miratohet akti normativ për uljen e akcizës së karburanteve, i pranishëm Rama

Kuvendi miratoi pas një seance maratonë mesnatën e djeshme, disa projektligje dhe vendime të rëndësishme, mes të cilave dhe aktin normativ për uljen e akcizës për naftën.

Sipas aktit të miratuar me 85 vota pro dhe 25 kundër, parashikohet që në rast se çmimi i shitjes me pakicë, për naftën është më i lartë se 220 lek/litri, apo për benzinën është më i lartë se 200 lek/litri, do të zbatohet niveli 80% i akcizës.

Në procesin e votimit ishte i pranishëm edhe kryeministri Edi Rama, i cili më herët ishte thirrur në një interpelancë nga deputetët e Partisë Demokratike. Refuzimi që interpelanca të zhvillohej drejtpërdrejt me kreun e qeverisë ndezi përplasjet në sallë, ku opozita kërkoi edhe dorëheqjen e kryeparlamentarit Niko Peleshi, duke e akuzuar se nuk po respektonte rregulloren dhe Kushtetutën.

Ndër aktet më të rëndësishme të miratuara ishte Akti Normativ për një shtesë në ligjin “Për akcizat në Republikën e Shqipërisë”, i cili kaloi me 85 vota pro dhe 25 kundër. Kuvendi miratoi gjithashtu marrëveshjen ndryshuese për programin IPA të bashkëpunimit ndërkufitar Mali i Zi–Shqipëri 2021–2027 me 108 vota pro dhe vetëm 1 abstenim.