SERBI – Protestë masive në Beograd para zgjedhjeve parlamentare, studentët sfidojnë Vuçiçin

BEOGRAD, 23 tetor /ATSH-DPA/- Dhjetëra mijëra njerëz u mblodhën dje në kryeqytetin e Serbisë, Beograd, në protestën përmbyllëse të listës zgjedhore të mbështetur nga studentët e opozitës, tri ditë para zgjedhjeve parlamentare të së dielës.

Sipas portalit të lajmeve “Danas.rs”, pjesëmarrësit dëgjuan fjalimet e 10 kandidatëve në sheshin qendror “Slavija”.

Lista e re, e krijuar nga lëvizja studentore, po sfidon Partinë Progresive Serbe (SNS), në pushtet, të drejtuar nga politikani Aleksandar Vuçiç, i cili ka dominuar politikën serbe për 14 vjet.

Sondazhet tregojnë se gara mes dy palëve pritet të jetë e ngushtë.

“Jemi lodhur duke parë se ligji nuk zbatohet njësoj për të gjithë”, deklaroi kandidati Tihomir Stanić gjatë tubimit.

Ai tha se Serbia meriton liri, drejtësi dhe një qeveri që mban përgjegjësi për veprimet e saj.

Folës të tjerë e përshkruan zgjedhjet e së dielës si një përballje mes Serbisë dhe mafies, mes lirisë dhe skllavërisë, mes përparimit dhe rënies.

Kritikët akuzojnë qeverinë e Vuçiçit se ka lejuar përhapjen dhe rrënjosjen e korrupsionit.

Në shtator, Vuçiçi dha dorëheqjen nga posti i presidentit, në një veprim që u cilësua si taktikë politike për t’i hapur rrugën marrjes së postit të kryeministrit.

Kritikët e akuzojnë gjithashtu se ka vënë një pjesë të madhe të sistemit gjyqësor nën kontrollin e tij, se përdor mbështetësit e partisë në pushtet për të frikësuar kundërshtarët politikë dhe se kufizon lirinë e medias.

Gjatë qeverisjes së Vuçiçit, Serbia ka bërë pak përparim drejt synimit për t’u anëtarësuar në Bashkimin Evropian.

Lista zgjedhore e mbështetur nga studentët u krijua nga një lëvizje studentore që u shfaq pas protestave masive, të cilat nisën pas shembjes së tendës së çatisë së një stacioni hekurudhor në qytetin verior të Novi Sadit, në nëntor 2024. Nga kjo tragjedi humbën jetën 16 persona.

Kritikët fajësuan korrupsionin dhe neglizhencën e autoriteteve nën qeverinë e Vuçiçit për katastrofën. /