Sesioni i ri parlamentar me debate të vjetra, Kaso: Opozita kërkon konsensus për territorialen

Deputetët rikthehen në aulën parlamentare më 8 shtator, në seancën e parë plenare të sesionit të ri pas pushimeve verore. Ky sesion pritet të nisë me debatet e mbarsura mes palëve për ndarjen administrative territoriale, një çështje shumë sensitive për rezultatet e forcave politike në garat vendore.

Komisioni i posaçëm parlamentar u nda pa konsensus mes mazhorancës dhe opozitës. Shumica kërkon që harta e re territoriale të ketë 15 bashki më pak, ndërsa demokratët insistojnë në shtimin e numrit të tyre, nga 61 që janë aktualisht deri në 100.

Për opozitën është i papranueshëm drafti i njëanshëm i socialistëve, pasi, siç thonë është i mirëkalkuluar prej tyre për të marrë rezultatet në tavolinë në zgjedhjet vendore të vitit të ardhshëm.

“Ka një qëndrim politik të Partisë Demokratike që nuk njeh produktin e njëanshëm të Partisë Socialiste për sa i përket reformës administrative territoriale Një ushtrim që presupozoj të ishte i përbashkët”, tha deputeti demokrat Ivi Kaso.

Pavarësisht kontestimeve, opozita nuk ka votat e mjaftueshme në Kuvend për të rrëzuar draftin e shumicës. Në këto kushte, deputeti demokrat Ivi Kaso thotë se opozita do të duhet të shfrytëzojë instrumente të tjera politike, siç është ankimimi në Gjykatën Kushtetuese, nëse mazhoranca vendos me forcën e kartonave të saj, si dhe gjetjen e hapësirave kushtetuese për mbajtjen e referendumit.

“Forma e marrjes së mendimit të popullatës lokale që neni 108, pika 2, i Kushtetutës parashikon si prerogativë për miratimin e një reforme të tillë”, tha Kaso.

Opozita i është drejtuar edhe faktorit ndërkombëtar që të jetë arbitri i palëve për këtë reformë, nisur nga fakti se miratimi me konsensus i reformës territoriale dhe i reformës zgjedhore është kriteri i përcaktuar nga Brukseli për çështjen e integrimit europian.