SHBA – Bessent: Kompanitë ajrore iraniane do të bllokohen nga 23 shtatori

UASHINGTON, 21 shtator /ATSH-ANSA/ – Kompanitë ajrore iraniane do të përballen me bllokim në mbarë botën nga 23 shtatori, njoftoi sekretari amerikan i Thesarit, Scott Bessent.

Gjatë një interviste për televizionin CNBC, Bessent deklaroi se, pas dy ditësh, kompanitë ajrore iraniane do të kenë “vështirësi serioze” për të operuar në nivel global, si pasojë e sanksioneve amerikane.

Sipas tij, masat janë pjesë e planeve të Shteteve të Bashkuara të Amerikës për të ruajtur presionin ekonomik ndaj Teheranit.

“Nga 23 shtatori, të gjitha kompanitë ajrore iraniane do të bllokohen në të gjithë botën”, deklaroi sekretari amerikan i Thesarit.

Bessent shpjegoi se, nëse avionët iranianë do të ulen në aeroporte, atyre nuk do t’u ofrohet karburant apo shërbime të asistencës në tokë.

Gjithashtu, sipas tij, nuk do të mund të shiten bileta për këto kompani, pasi subjektet që do të kryenin këto veprime do të rrezikonin përjashtimin nga sistemi financiar i dollarit amerikan.

“Nëse ulen, nuk do të jetë e mundur t’u ofrohet karburant ose shërbime të asistencës në tokë, as të shiten bileta, përndryshe rrezikohet përjashtimi nga sistemi i dollarit”, tha Bessent.

Sekretari amerikan vlerësoi se masat shtrënguese ndaj ekonomisë iraniane po japin rezultate.

Ai nuk dha në këtë deklaratë detaje të mëtejshme mbi zbatimin teknik të bllokimit, apo ndikimin e plotë të masave te fluturimet ndërkombëtare të kompanive iraniane. /Ad.Ab./ a.jor.