SHBA, e sëmura me kancer zgjedh të vdesë më 1 nëntor!

Tumori në tru i diagnostikuar në janar, i është rishfaqur. Më agresiv se më parë. Për mjekët, Britani Mejnardit nuk i mbeten më shumë se gjashtë muaj jetë.

Kështu, 29-vjeçarja kaliforniane ka vendosur: vetëvrasje të asistuar. Më 1 nëntor do të vdesë në Oregon, një nga pesë shtetet e Amerikës, ku së sëmurëve pa shpresa jete, u lejohet që të shmangin vuajtjet. “Kush ka të drejtë të vendosë se meritoj të vuaj kaq shumë për javë apo për muaj?”, – ka pyetur Britani.

Një ditë para se të vdesë, më 30 tetor, Britani do të festojë datëlindjen e bashkëshortit të saj, Dan. Pastaj dëshira e saj do të realizohet. “Unë nuk dua të vdes, por po vdes dhe dua ta bëj sipas kushteve të mia, me dinjitet”, – tregon e reja për mediet amerikane.

Falë një ligji të 1997-ës, në Oregon (si në Vermont, Montana, Nju Meksiko e Uashington), vetëvrasja e asistuar është e ligjshme. Që kur ka hyrë në fuqi ligji, 1.173 persona kanë fituar të drejtën për përdorimin e substancave të tilla farmaceutike, por vetëm 752 i kanë përdorur.

Këto javë të fundit të jetës, Britani po i kalon duke ndihmuar pacientët e shoqatës “Compassion & Choices”, që kujdeset për të sëmurët pa shpresa jete në Kaliforni, Kolorado, Konektikat, Masaçusets dhe Nju Xhersi.

Dhe mbron me të gjithë forcën e saj zgjedhjen e “vdekjes me dinjitet” me fushatën “Brittani Maynard Fund”, duke kërkuar që edhe shtete të tjera në SHBA të lejojnë përdorimin e substancave të tilla farmaceutike.

“Familjes sime i është dashur të përballojë ndryshime dhe sakrifica të mëdha për të më lejuar t’i jap fund jetës sime me dinjitet, njëlloj sikur të gjej një vend të ri ku të jetoj dhe një shtëpi të re. Ka shumë amerikanë që nuk kanë mundësinë apo paratë për të vepruar si unë dhe kjo nuk është e drejtë”, – përfundon 29-vjeçarja.