SHBA – Trump: Nuk besoj se Kina dhe Rusia po ndihmojnë Iranin

Deklarata vjen mes raportimeve se subjekte kineze dhe ruse i kanë furnizuar autoritetet iraniane me informacione zbulimi për sulmet ndaj trupave amerikane.

Duke iu përgjigjur pretendimeve për ndihmën e mundshme të Pekinit dhe Moskës për Teheranin, presidenti Trump shkroi në rrjetin e tij social Truth Social se, edhe nëse një mbështetje e tillë ekziston, ajo është në një nivel shumë të ulët.

“Nuk besoj aspak se po e bëjnë këtë”, theksoi presidenti amerikan, duke shtuar se Uashingtoni do ta merrte vesh shumë shpejt nëse do të kishte prova për një përfshirje të tillë.

Presidenti Trump kishte deklaruar edhe në korrik se nuk besonte që Kina dhe Rusia po i shisnin armë Iranit, duke paralajmëruar se një veprim i tillë do të kishte pasoja të rënda për të dyja vendet.

Kina dhe Rusia ruajnë marrëdhënie të ngushta me Iranin, por deri më tani janë përmbajtur nga përfshirja e drejtpërdrejtë në luftën në Lindjen e Mesme, e cila nisi më 28 shkurt me sulmet amerikano-izraelite.

Rusia ka dërguar ndihma humanitare në Iran, ndërsa Kremlini ka mohuar raportimet e mediave amerikane se Moska i ka përcjellë Teheranit informacione të ndjeshme, përfshirë vendndodhjen e anijeve luftarake dhe avionëve amerikanë në rajon.

Ndërkohë, Kina ka dënuar ashpër sulmet amerikane dhe izraelite, por ka kritikuar gjithashtu sulmet iraniane ndaj vendeve të Gjirit dhe bllokimin e Ngushticës së Hormuzit.

Pekini ka furnizuar më parë Iranin me dronë dhe pajisje me përdorim të dyfishtë, civil dhe ushtarak, por ka mohuar raportimet se kompania e tij kryesore e gjysmëpërçuesve, “Semiconductor Manufacturing International Corporation”, i ka dërguar Iranit pajisje për prodhimin e çipave.

Kina dhe Rusia janë akuzuar gjithashtu se po e ndihmojnë Iranin të anashkalojë sanksionet ndërkombëtare që synojnë shitjet e naftës. Nga ana e tij, presidenti Trump ka mbajtur shpesh një ton më pajtues ndaj presidentit kinez Xi Jinping dhe presidentit rus Vladimir Putin sesa ndaj disa prej aleatëve të vet, duke argumentuar se udhëheqësit e fuqive të mëdha botërore duhet të trajtohen me respekt. /Ad.Ab./ a.jor.