SHBA – Trump refuzon propozimin e Iranit për armëpushim të kushtëzuar

– Presidenti amerikan Donald Trump ka refuzuar një propozim të Iranit për një armëpushim shtatëditor, i cili do të lidhej me rihapjen e ngushticës së Hormuzit dhe rifillimin e negociatave për programin bërthamor iranian.

Sipas raportimeve të cituara nga “The Wall Street Journal”, propozimi u bë në kuadër të kontakteve diplomatike në Nju Jork.

Sipas planit të paraqitur nga ministri i Jashtëm iranian Abbas Araghchi, Teherani do të mund të rihapte ngushticën e Hormuzit brenda shtatë ditësh nëse SHBA-ja do të hiqte bllokadën detare ndaj porteve iraniane, do të lehtësonte kufizimet ndaj eksporteve të naftës dhe do të pranonte një armëpushim që përfshinte edhe Libanin.

Pas kësaj do të rifillonin negociatat për çështjen bërthamore.

Raportimet amerikane, megjithatë, thonë se presidenti Trump e ka refuzuar këtë propozim.

Duke cituar zyrtarë amerikanë “The Wall Street Journal” raporton se presidenti Trump u ka thënë bashkëpunëtorëve se është i përgatitur për mundësinë e rifillimit të bombardimeve ndaj Iranit pas zgjedhjeve amerikane të mesmandatit nē nëntor.

Këto janë raportime mbi qëndrime të shprehura privatisht dhe jo një njoftim zyrtar për një operacion të ardhshëm.

Në të njëjtën kohë, kanalet diplomatike nuk janë mbyllur plotësisht.

Raportime të tjera thonë se bisedimet përmes ndërmjetësve vazhdojnë dhe se çështja bërthamore mbetet pjesë e diskutimeve.

Presidenti iranian Masoud Pezeshkian ka deklaruar gjithashtu se Irani mund të lejojë rikthimin e inspektorëve ndërkombëtarë të energjisë bërthamore në kuadër të një marrëveshjeje. /Ad.Ab./ a.jor.