Kongresmeni amerikan Xho Vilson i kërkon EPP-së të ndërpresë çdo lidhje me SNS-në e Vuçiçit: ‘Parti e korruptuar autoritare’

Kongresmeni amerikan Xho Vilson i ka dërguar letër presidentit të Partisë Popullore Evropiane (EPP), Manfred Veberit, me të cilën kërkon që EPP të revokojë zyrtarisht statusin e anëtares së asociuar të Partisë Progresiste Serbe (SNS) të Aleksandër Vuçiçit dhe të ndërpresë çdo lidhje tjetër me të.

Në rrjetin X Vilson shkroi se “Vuçiçi dhe partia e tij e korruptuar autoritare janë kundër qytetërimit perëndimor dhe nuk duhet të kenë asnjë lidhje me EPP-në”, duke shtuar se Evropa duhet të përballet me “manipulimet zgjedhore të Vuçiçit” dhe të kërkojë zgjedhje të lira e të ndershme në Serbi.

Në letër thuhet se SNS prej kohësh ka treguar se nuk është e përkushtuar ndaj garës demokratike dhe se është thelbësore që vendimi të merret para zgjedhjeve parlamentare të 25 tetorit 2026, që SNS të mos e përdorë emrin e mirë të EPP-së për legjitimin e vet. Vilson e akuzon SNS-në se nën Vuçiçin ka abuzuar vazhdimisht me burimet shtetërore dhe shërbimet e sigurisë për të manipuluar zgjedhjet, citon vlerësimin e ODIHR-it se zgjedhjet parlamentare të 2023-shit u mbajtën në “kushte të padrejta” dhe se asnjë nga rekomandimet nuk është zbatuar.

Sipas letrës, 96 për qind e hapësirës së transmetimit publik i takon Vuçiçit kundrejt 4 për qind për opozitën, dhe është përdorur “në mënyrë të paligjshme softuer sekret mbikëqyrjeje kundër studentëve dhe opozitës”. Vilson e krahason SNS-në me partinë e Vladimir Putinit “Rusia e Bashkuar”, duke thënë se drejtohet në mënyrë kleptokratike, dhe përmend shembjen e strehës së stacionit hekurudhor në Novi Sad (16 të vdekur) si viktima të korrupsionit të Vuçiçit.

Ai thotë gjithashtu se Vuçiçi e ka shndërruar Serbinë në një bastion të ndikimit të Partisë Komuniste kineze në Evropë, ka integruar teknologji kineze mbikëqyrjeje dhe ushtarake, ndërsa kompania më e madhe serbe e naftës dhe gazit është në pronësi të Rusisë, dhe se SNS dërgoi delegacion në varrimin e “terroristit Hamenei”. Lëvizja studentore në Serbi, sipas letrës, po përpiqet të rikthejë sundimin e ligjit që SNS e shkatërroi.

Burimi: Nova.rs