Sherri politik mbërrin në Komitetin Shqipëri-BE, dështon rezoluta e përbashkët

Komiteti Parlamentar për Stabilizim-Asociim Shqipëri–Bashkimi Evropian nuk ka arritur të miratojë një rezolutë të përbashkët lidhur me procesin e integrimit europian të Shqipërisë, për shkak të mungesës së dakordësisë mes Partisë Socialiste dhe Partisë Demokratike.

Pavarësisht diskutimeve të zhvilluara gjatë punimeve të komitetit, mazhoranca dhe opozita mbetën në qëndrime të kundërta, duke bërë të pamundur miratimin e një dokumenti të përbashkët me Parlamentin Evropian.

Ndarjet mes palëve u reflektuan edhe gjatë seancave të një dite më parë, ku kryetarët e grupeve parlamentare, Taulant Balla dhe Gazment Bardhi, paraqitën para eurodeputetëve vizione të ndryshme për situatën politike dhe institucionale në vend.

Përfaqësuesit e mazhorancës vunë theksin te progresi i Shqipërisë në negociatat me Bashkimin Evropian dhe ritmi i hapjes e mbylljes së kapitujve, ndërsa opozita ngriti shqetësime për korrupsionin, funksionimin e shtetit ligjor dhe aferat që, sipas saj, përfshijnë qeverinë.