Kryetari i Parlamentit, Talat Xhaferi falënderoi ligjvënësit për “bashkëpunimin dhe besimin” e treguar gjatë këtyre tre viteve.
Akti i shpërndarjes së parlamentit u parapri me debate të gjata, shpesh herë me një atmosferë të tensionuar kryesisht mes deputetëve të VMRO-së opozitare dhe të Lidhjes Social Demokrate në pushtet, mbi ligjin për Prokurorinë dhe disa ligje të tjera.
Miratimi i ligjit për Prokurorinë Publike, që është pjesë e paketës së reformave të gjyqsorit e disa ligje të tjera ishin kushti që kishte vendosur ish-Kryeministri Zoran Zaev dhe kryetari i Lidhjes Social Demokrate, në mënyrë që të shkohej në zgjedhje të parakohshme. Por opozita e drejtuar nga VMRO-DPMNE-ja hedhi akuza të rënda ndaj LSDM-së dhe zotit Zaev se me anë të ligjit për Prokurorinë po “amnistonte veten e tij dhe kriminelët rreth tij”, siç u shprehën përfaqësues të saj.
Nga ana tjetër, ekspertë dhe njohës të rrethanave politike në Maqedoninë e Veriut kanë reaguar gjatë përpilimit të ligjit, sepse nuk do të lejohen që bisedat e përgjuara telefonike, apo “bomba” siç njihen ndryshe në opinionin publik, të mund të përdoren në procese gjyqësore.
Shumica parlamentare e mbështetur edhe nga disa ligjvënës të shkëputur nga VMRO-ja, arriti të sigurojë dy të tretat e votave të nevojshme, gjithësej 80 vota për miratimin e ligjit. Ligjvënësit e VMRO-DPMNE-së reaguan ashpër dhe i kërkuan presidentit Stevo Pendarovski që të mos e dekretojë ligjin.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.