“Vendosa vetë”: i akuzuari për djegien e automjeteve të ambasadës bullgare në Shkup pranon fajin

I akuzuari për djegien e dy automjeteve diplomatike të ambasadës së Bullgarisë në Shkup e pranoi plotësisht fajin në seancën gjyqësore të mbajtur sot, njofton Fokus. “Ndihem fajtor dhe e pranoj plotësisht fajin. Vendosa vetë”, deklaroi ai para gjykatës, duke theksuar se askush nuk e kishte nxitur dhe as urdhëruar.

Bëhet fjalë për Igor Dragashkovskin, 44 vjeç nga Shkupi. Incidenti ndodhi më 15 qershor, rreth orës 12:05, në bulevardin “Mitropolit Teodosij Gologanov”, në afërsi të ambasadës bullgare. Sipas prokurorisë, ai kishte mbërritur me autobus, kishte mbushur benzinë në një shishe plastike në një pikë karburanti aty pranë dhe, i veshur me një bluzë me figurën e Goce Dellçevit, i kishte lagur automjetet me benzinë dhe i kishte ndezur me çakmak.

Kundër 44-vjeçarit zhvillohet procedurë për veprën penale “shkaktim i rrezikut të përgjithshëm”, sipas nenit 288 të Kodit Penal, siç kishte njoftuar më herët Prokuroria Themelore Publike e Shkupit.

Në kuadër të procesit gjyqësor po shqyrtohet edhe gjendja psikike e të akuzuarit në momentin e kryerjes së veprës, ndaj në seancën e radhës pritet të dëgjohet një ekspert psikiatrik.

Seanca e radhës është caktuar për më 11 nëntor, kur sipas raportimeve pritet të ftohet edhe një përfaqësues i ambasadës bullgare. Ambasada i tha agjencisë BTA se nuk ishte njoftuar për seancën e sotme; në qershor Shkupi e kishte dënuar djegien e automjeteve.