Shpallet tenderi 1,5 milionë euro për rikonstruksionin e rrugës Guci–Vusanje

Ministria e Punëve Publike e Malit të Zi (Ministarstvo javnih radova) shpalli tenderin për rikonstruksionin e rrugës Guci–Vusanje (Gusinje–Vusanje), siç njofton CdM. Segmenti që do të rikonstruktohet është 1,9 kilometra i gjatë, ndërsa vlera e punimeve është 1,5 milionë euro.

Projekti parashikon rikonstruksionin e një pjese të rrugëve Alipashina dhe Vusanjska, zgjerimin e rrugës (kolovoz), ndërtimin e sistemit të kanalizimit atmosferik dhe sinjalistikën horizontale e vertikale.

Qëllimi i ndërhyrjes, sipas ministrisë, është përmirësimi i lidhjes rrugore dhe i cilësisë së jetesës së banorëve të Gucisë dhe zonës përreth.

Ministria thotë se vazhdon investimet konkrete në infrastrukturë, me prioritet rrugë më të sigurta e më cilësore në të gjitha komunat, veçanërisht në veri të vendit.

Gucia është komunë me shumicë shqiptare në veri të Malit të Zi, në zonën e Plavës, në rrëzë të Bjeshkëve të Nemuna.