Shtabi i Përgjithshëm ukrainas: goditëm tre objekte të prodhimit të raketave në Rusi, mes tyre qendrën e çmontimit të raketave në Nizhny Novgorod

Shtabi i Përgjithshëm i Forcave të Armatosura të Ukrainës tha të premten se forcat ukrainase goditën gjatë natës tri objekte në Rusi që janë pjesë e zinxhirit të prodhimit të raketave, siç njofton Reuters.

Në një deklaratë të publikuar në Telegram, Shtabi saktësoi se objektivat ishin një fabrikë në rajonin Tver që prodhon komponentë raketash, si dhe një qendër për “likuidimin” (çmontimin) e raketave balistike ndërkontinentale në rajonin Nizhny Novgorod. Sipas deklaratës, goditja e qendrës së Nizhny Novgorod-it kishte për synim dobësimin e aftësisë së Rusisë për të siguruar eksplozivë dhe karburant raketor.

Guvernatori i Nizhny Novgorod-it tha se një ushtar u vra gjatë zmbrapsjes së sulmit dhe se mbetjet e dronit shkaktuan dëme “minimale” në infrastrukturë.

Ndërkohë, guvernatori i rajonit Tver deklaroi të premten në mëngjes se një sulm me dron shkaktoi zjarr në uzinën në Redkino, por zjarri u shua pa pasoja të mëtejshme.

Sulmi vjen në një kohë kur Ukraina ka intensifikuar goditjet me dronë vendas me rreze të gjatë ndaj rafinerive dhe objekteve ushtarake ruse, në një fushatë që Kievi e përshkruan si “përgjigje pasqyruese” ndaj sulmeve ruse kundër infrastrukturës ukrainase.