Skandali “Cambridge Analytica”, Parlamenti britanik kërkon Mark Zuckerberg

Kreu i Komitetit që po heton lajmet e rreme, akuzoi drejtpërdrejtë Facebook për keqpërdorim të të dhënave dhe për keqinformim të këtij komiteti.

Javën e kaluar, Collins tha se do të dëshironte sqarime nga vetë Mark Zuckerberg për këtë çështje dhe tani kërkesa është bërë zyrtare edhe me shkrim.

“Është koha që të dëgjojmë prej drejtuesve më të lartë të Facebook, me autoritetin dhe kapacitetin për të na dhënë sqarimet e nevojshme për këtë dështim katastrofik në mbrojtjen e të dhënave të qytetarëve”, thuhet në kërkesën e Collins.

Vetë kompania konsultuese, “Cambridge Analytica” mohon se ka shkelur ligjet apo ka abuzuar në punën e saj, pavarësisht se Komisionerja e Informacionit në Britani, Elizabeth Denham deklaroi se do të kërkojë nga gjykata autorizimin për të kontrolluar zyrat e kësaj kompanie.

“Cambridge Analytica” besohet se i përdori të dhënat e mbi 50 milionë përdoruesve të “Facebook”-ut për të krijuar njoftime të individualizuara, duke shënjestruar votuesit amerikanë me mesazhe të caktuara.

Të dhënat u analizuan pjesërisht me atë që njihet si “modeli psikologjik i personalitetit” në bazë të 5 tipareve, apo ndryshe “OCEAN V”.

Falë asaj çfarë përftohet mund të shënjestrohen për shembull votuesit besimtarë me rreth 30% mesazhe të fokusuara te feja, 20% mesazhe mbi të drejtat e armëve dhe 30% mesazhe me përmbajtje ekonomike; ndërkohë që pjesëtarëve të shoqatës së armëve “NRA” u dërgohen më së shumti në “Facebook” mesazhe që lidhen me të drejtën e armëmbajtjes.