Skandali i Parlamentit: Më keq pyetjet apo përgjigjet e Vettingut?

Pedagogët e Jurisprudencës, kandidatë për trupën e këshillave për Vettingun, iu përgjigjën sot pyetjeve të komisionit përzgjedhës të ngritur pranë Parlamentit të Shqipërisë.

Në media , përgjigjet e pesë kandidatëve u komentuan gjatë ditës së sotme si një tregues i mangësive të tyre dhe mosnjohje të prokurorëve e gjyqtarëve të njohur vendas e të huaj.

Pyetjet e profesorit të Filozofisë, Përparim Kabo, testoi kandidatët për çështje që lidhen me njohuri në fushën e historisë. Por gazetari Mentor Kikia mendon ndryshe. Ai shkruan sot se skandal nuk janë përgjigjet, por pyetjet drejtuar kandidatëve.

Kikia shprehet se është njësoj sikur ta pyesësh Kabon për Kodin Penal dhe pastaj të gajasesh se ai nuk e dinte përgjigjen.

Ja çfarë shkruan Mentor Kikia:

Në media e rrjete sociale sot po gajasen të gjithë. Pedagogë që vijnë nga radhët e juristëve dhe që garojnë për anëtarë të komisioneve të vetingut, janë marrë në pyetje nga një komision profesorësh dhe ka rezultuar se ata nuk dinin tu përgjigjeshin ca pyetjeve të thjeshta që u bëri komisioni.

Dhe pyetjet ishin?

Çfarë ka qenë Alush Dragoshi?

Çfarë ka qenë Keanthi Koçi

Kush u vra iu pari, Falkone apo Borselino?

Ka raste kur është shkarkuar një prokuror i përgjithshëm nga parlamenti dhe është rikthyer me vendim të Gjykatës Kushtetuese?

Cili është objekti më i shtrenjtë që keni blerë në jetën tuaj?

Sa kushton makina juaj?

Pse s’ke makinë?

Kush prokuror e arrestoi guvernatorin e Bankës së Shqipërisë?

Cfarë libri po lexon aktualisht?

Në fakt kur mendon se ata pedagogë nuk dinë tu përgjigjen këtyre pyetjeve, si do të mund të jenë ata të zotë të kontrollojnë gjykatësit e prokurorët?

Por kur mendon se çfarë pyetjesh u bëhen atyre, të zë lemeria se çfarë është duke kërkuar komisioni.

Çfarë janë dhe përse shërbejnë këto pyetje?

Çfarë handikapi profesional është që një pedagog nuk njeh prokurorin e parë të përgjithshëm postkomunist që ka ikur pa lënë asgjë gjurmë në drejtësinë shqiptare?

Cfarë handikapi profesional është që nuk mban mend historinë se kush është vrarë i pari nga heronjtë e luftës kundër Mafias, Falkone apo Borselino?

Çfarë lidhjeje ka me profesioinalizmin e juristit pyetja se cili është objekti më i shtrenjtë që keni blerë në jetën tuaj?

Mund të duket mjerim formimi i përgjithshëm i këtyre juristëve, por në fakt ata nuk ishin aty në “Cuiz show” për të fituar një makinë me kilometrazh zero.

Ata vërtet mund të mos e dinë se çfarë ka qenë Alush Dragoshi (dhe më mirë që s’e dinë), por mund të jenë profesionalisht shumë të formuar. Tek e fundit, asnjë prej atyre pyetjeve nuk lidhen me drejtësinë dhe profesionin që ata kanë.

Eshtë njësoj sikur ta pyesësh atë që bënte pyetjet për Kodin Penal, e pastaj të gajasesh se ai nuk e dinte përgjigjen.

Problemi ynë është se duam dhe duhet t’i dimë të gjitha. Juristi duhet të njohë edhe ligjet, edhe historinë, edhe letërsinë, edhe sa vjeç ishte Kolombi kur shkoi në Amerikë, edhe në çfarë date ndodhi aksidenti atomik në Çernobil, sa herë është martuar Donald Trump dhe sa e ka numrin e gjoksit Kim Kardashian.

Njerëzit e vetingut nuk do tu testojnë nivelin e njohurive të përgjithshme gjykatësve dhe prokurorëve. Ata do të verifikojnë deklarimet e pasurisë së tyre dhe do të bëjnë hetimet sipas kritereve që përcakton ligji i vettingut për të parë se kush është i korruptuar e kush jo.