Skenderaj i jep lamtumirën e fundit Idriz Rrecajt, mbetjet e të cilit u gjetën në varrezën masive në Zubin Potok

Komuna e Skenderajt ka organizuar sot akademinë përkujtimore dhe ceremoninë e rivarrimit të mbetjeve mortore të veprimtarit Idriz Rrecaj, një nga viktimat e “Grupit të Intelektualëve”, eshtrat e të cilit u gjetën në varrezën masive në Zubin Potok. Akademia u mbajt në mesditë në Shtëpinë e Kulturës “Hasan Prishtina”, homazhet pranë arkivolit u bënë në Palestrën Sportive “Ilaz Kodra”, ndërsa ceremonia e varrimit është paraparë sot në orën 16:00 në Varrezat e Dëshmorëve në Marinë, siç njofton KosovaPress.

Kryetari i Skenderajt, Sami Lushtaku, në akademinë përkujtimore shprehu mirënjohje për familjen Rrecaj dhe tha se të gjithë duhet të jenë krenarë për punën dhe veprimtarinë e Idrizit, duke i uruar lavdi të përjetshme atij dhe të gjithë të rënëve për lirinë e vendit, sipas raportimit të DTV.

Bashkëveprimtari i tij, Gani Koci, e kujtoi Rrecajn si patriot të madh dhe veprimtar të palodhshëm, një nga figurat më të shquara e të nderuara të Skenderajt, duke veçuar fjalët e tij se “ja vlen të vdesësh për këtë tokë”, siç njofton KosovaPress. Në ceremoni morën pjesë edhe kryetarja e Kuvendit, Albulena Haxhiu, kreu i familjes Jashari, Rifat Jashari, deputetë dhe bashkëveprimtarë.

Idriz Rrecaj ishte aktivist dhe ndër themeluesit e degës së Lidhjes Demokratike të Kosovës në Skenderaj, ndërsa gjatë luftës ishte angazhuar edhe në Ushtrinë Çlirimtare të Kosovës si këshilltar i komandantit të Brigadës 112 “Arben Haliti”.

Ai ishte në mesin e 23 burrave të rrëmbyer nga forcat serbe më 19 prill 1999, të njohur si “Grupi i Intelektualëve”. Në shtator u bë e ditur se analizat e ADN-së kanë konfirmuar se tri nga mbetjet mortore të gjetura në Kalludër dhe Jabukë të Zubin-Potokut u përkasin Rrecajt, Adem Beqirit dhe Salih Mëziut, aktivistë nga Skenderaj dhe Mitrovica që figuronin të zhdukur që nga ajo kohë.