SOFJE – Bullgaria refuzon pjesëmarrjen në ndihmën e re financiare të BE-së për Ukrainën

SOFJE, 20 tetor /ATSH-DPA/ – Bullgaria nuk do të marrë pjesë në paketat e reja të ndihmës financiare të Bashkimit Evropian për Ukrainën, deklaroi sot kryeministri bullgar, Rumen Radev.

Duke folur për gazetarët në qytetin e vogël Tvarditsa, kryeministri Radev kundërshtoi kërkesën e presidentit ukrainas, Volodymyr Zelensky, për një financim shtesë prej 70 miliardë eurosh (78,6 miliardë dollarë) për vitin e ardhshëm, me qëllim mbështetjen e Ukrainës në luftën kundër agresionit rus.

“Si ju duket kjo në sfondin e gjithçkaje që po ndodh në Evropë? Bullgaria nuk mund të përfshihet në asnjë mënyrë në këtë paketë prej 70 miliardë eurosh”, deklaroi Radev, sipas agjencisë bullgare të lajmeve BTA.

Kryeministri kujtoi se Bashkimi Evropian kishte miratuar vitin e kaluar një paketë huaje prej 90 miliardë eurosh për Ukrainën, që mbulonte periudhën 2026-2027.

Tri vende anëtare, Hungaria, Çekia dhe Sllovakia, kishin negociuar përjashtimin nga kontributi financiar për këtë hua, ndërsa Bullgaria kishte marrë pjesë në financimin e saj.

Radev argumentoi se lufta në Ukrainë po rëndon gjithnjë e më shumë mbi ekonomitë evropiane, duke shkaktuar tensione sociale dhe paqëndrueshmëri politike.

Ai bëri thirrje për përfundimin sa më të shpejtë të konfliktit.

“Zgjidhja nuk do të arrihet me mjete ushtarake”, theksoi kryeministri bullgar, i cili ka shërbyer më parë si president i vendit nga viti 2017 deri në dorëheqjen e tij në janar 2026./ /Ad.Ab./ a.jor.