SPAK dhe pyetjet e pazgjidhura të Reformës në Drejtësi

Që nga nisja e Reformës në Drejtësi para rreth një dekade, SPAK-u ka qenë temë qendrore në sondazhet kombëtare. Institucioni përmendet shpesh në anketa dhe barometra publik, ndërsa perceptimi pozitiv ndaj tij zakonisht sillet rreth 67 përqind.

Raporton javanews se sondazhet kryesore—përfshirë Anketën Kombëtare të IDRA-s, Barometrin e Sigurisë së CSDG-së, matjet e Data Centrum, ‘Termometrin Politik’ dhe ‘Zërin e Shqiptarëve’—kanë përfshirë pyetje të ndryshme për rolin dhe efektivitetin e SPAK-ut në luftën kundër krimit dhe korrupsionit.

Megjithatë, mbeten disa çështje të mëdha të pazgjidhura që publiku pret të shohë të ndjekura deri në fund.

A do të ndiqet penalisht zaptimi i institucioneve shtetërore më 14 shtator 1998?

A do të sjellë drejtësi hetimi për ngjarjet e 21 janarit 2011, ku katër protestues humbën jetën dhe të tjerë u plagosën?

A do të hetohen dhe ndëshkohen përgjegjësit për tragjedinë e Gërdecit, ku humbën jetën 26 veta dhe u plagosën qindra të tjerë?

A do të sqarohet dhe ndëshkohet roli i zyrtarëve që mundësuan keqpërdorime në sektorin energjetik, përfshirë çështjen e kompanisë ÇEZ?

A do të ndjeken më tej çështjet që lidhen me shmangien e pagesave ndaj shtetit nga subjektet e naftës, përfshirë rastin e Bankers Petroleum?

A do të sqarohen përgjegjësitë për skemat e inceneratorëve në Elbasan, Fier dhe Tiranë dhe përfitimet e paligjshme që këto projekte mund të kenë sjellë?

A do të hetohen projektet rrugore që dyshohen se janë realizuar mbi kostot normale dhe në dëm të interesit publik?

Publiku pret që SPAK-u të japë përgjigje të qarta për këto çështje dhe të forcojë besueshmërinë e Reformës në Drejtësi, sipas javanews.