SPANJË – Sekuestrohen 2,1 tonë kokainë

MADRID, 21 shtator /ATSH-DPA/ – Autoritetet spanjolle kanë sekuestruar një jaht që transportonte 2,1 tonë kokainë, rreth 650 kilometra larg brigjeve të Galicias, në veriperëndim të Spanjës.

Jahti, 14 metra i gjatë që lundronte nën flamurin polak, u tërhoq drejt portit të Vigos.

Sipas AEAT, jahti ishte nën vëzhgim që prej nisjes së tij në korrik nga porti i Roses, në bregdetin mesdhetar të Spanjës, pranë kufirit me Francën.

Autoritetet doganore spanjolle deklaruan se ngjarja mund të lidhet me një grup kriminal të specializuar në kontrabandën e drogës përmes jahteve me vela.

Grupi dyshohet se u ka ofruar shërbime organizatave kriminale në Evropën Lindore dhe në Ballkan.

Në operacionin e suksesshëm morën pjesë edhe autoritetet doganore franceze, policia e Polonisë dhe e Britanisë së Madhe, si dhe Agjencia Amerikane për Luftën kundër Drogës (DEA).

Fillimisht, AEAT nuk bëri të ditur origjinën e drogës, apo kohën dhe vendin ku kokaina ishte ngarkuar në jaht.

Agjencia e cilësoi operacionin si pjesë të luftës kundër trafikut të drogës në të ashtuquajturën “rruga transatlantike e kokainës”.

Kjo rrugë njihet për përdorimin e varkave me vela që nisen nga Amerika e Jugut.

Droga transferohet në mes të Oqeanit Atlantik dhe më pas kontrabandohet drejt Evropës në mënyrë sa më të padukshme./ /Ad.Ab./ a.jor.