SPANJË- Zjarret vazhdojnë, evakuohen mbi 1 000 persona

MADRID, 11 gusht /ATSH – AA/ – Më shumë se 1.000 njerëz u evakuuan sot nga shtëpitë e tyre në Spanjë ndërsa zjarre të mëdha pyjore dogjën provincat Castellon dhe Huelva, pak ditë përpara se miliona njerëz priten të dalin jashtë për të parë një eklips total diello.r

Rreth 900 njerëz u evakuuan nga qyteti Cati në provincën lindore të Castellonit ndërsa zjarrfikësit luftuan me një zjarr pranë Tirigut që ka prekur 684 hektarë deri më sot.

Zjarri ishte një nga disa që shpërtheu pas stuhive të thata në zonë të premten. Edhe pse lagështia e lartë gjatë natës i ndihmoi zjarrfikësit të përparonin, autoritetet mbetën veçanërisht të shqetësuara për një krah verior që përparonte drejt Cati-t, ku ndodhen më shumë se 60 ferma blegtorale.

Në provincën jugore Huelva, një tjetër zjarr pyjor që shpërtheu të enjten pranë Nieblas detyroi 467 njerëz të largohen nga shtëpitë e tyre ndërsa ka prekur rreth 8.000 hektarë. Shumica e të evakuuarve janë banorë të Berrocalit, një qytet që ka qenë në qendër të një zjarri shkatërrues të vitit 2004 që dogji rreth 34 mijë hektarë.

Zjarret vijnë pasi autoritetet në të gjithë Spanjën janë në gatishmëri të shtuar përpara eklipsit total diellor të së mërkurës, kur turma të mëdha pritet të udhëtojnë në zonat rurale, malet dhe pikave panoramike për të vëzhguar ngjarjen e rrallë.

Pjesa më e madhe e Spanjës parashikohet të përballet me rrezik shumë të lartë ose ekstrem nga zjarri atë ditë, sipas agjencisë së motit të vendit AEMET, duke ngritur shqetësime se një fluks vizitorësh në zona të thata dhe pyjore mund të ndezë zjarre të reja ose të komplikojë aksesin e emergjencës.