Stuhia “Ciaran” vazhdon rrugën nëpër Evropën Perëndimore, deri më tani 16 viktima
Stuhia “Ciaran” që goditi vendin tonë të premten ka mbërritur tani me erëra të forta e reshje të dendura shiu në qytetin Muxia në bregun verilindor të Spanjës.
Numri i viktimave nga kjo stuhi u rrit në të paktën 16 në të gjithë Evropën Perëndimore.
Të paktën gjashtë persona humbën jetën në rajonin qendror të Toskanës, njoftuan autoritetet italiane, duke shpallur gjendjen e jashtëzakonshme pasi specialistët e motit raportuan reshje rekord.
Tre persona të tjerë u vranë në brigjet e Portugalisë, kur një jaht u rrëzua në veri të Lisbonës nga një valë e fortë ere.Pemët e rrëzuara nga erërat e forta shkaktuan disa nga vdekjet e tjera në Evropë. Në qytetin belg të Gentit, rënia e pemëve vrau një 5-vjeçar ukrainas dhe një grua 64-vjeçare.
Zyrtarët francezë raportuan gjithashtu vdekjen e një burri që ra nga ballkoni i tij në qytetin port të Le Havre. Në Anglinë jugore, qindra shkolla u mbyllën të enjten pasi valët e mëdha të fuqizuara nga erërat me shpejtësi 135 km/h u përplasën përgjatë vijës bregdetare. Reshjet e dendura të shiut dhe erërat rekord sollën kaos në udhëtime.
Shërbimet ajrore, hekurudhore dhe ato të trageteve patën anulime dhe vonesa të gjata në disa vende. Më shumë se 200 fluturime u anuluan në aeroportin Schiphol të Amsterdamit, një qendër kryesore evropiane. Spanjë, më shumë se 80 fluturime u anuluan në 11 aeroporte dhe shërbimet hekurudhore u pezulluan në veriperëndim
Shkencëtarët kanë paralajmëruar se bota do të përjetojë më shumë ngjarje ekstreme të motit për shkak të ngrohjes globale të shkaktuar nga gazrat serrë.
