SUEDI – Disa të plagosur nga sulmi me shpatë në një shkollë

OSLO, 21 gusht /ATSH -AA/ -Disa njerëz u plagosën pasi një person i armatosur me shpatë hyri në një shkollë në Fagersta, Suedinë qendrore, tha transmetuesi publik SVT dhe bashkia.

Policia dhe shërbimet e urgjencës u thirrën në shkollën Brinell në orën 14:06 me orën lokale, sipas bashkisë Fagersta.

Bashkia njoftoi se sulmuesi ishte në paraburgim nga policia dhe se oficerët po kontrollonin shkollën.

“Ne kemi një operacion në vazhdim në zonë dhe kjo është gjithçka që mund të themi për momentin,” tha Pelle Vamstad, një oficer i shtypit i policisë.

Në vendngjarje ndodhen ambulancat, njësitë policore, një helikopter policor dhe një ekip policor për reagim.

Disa shkolla dhe objekte në Fagersta u mbyllën pas incidentit, duke përfshirë Olympen, Fagerstahallen, Risbroskolan, Skogsglantan, Bjorksta, Prastkragen dhe Norrbybacken.

Ministri i Drejtësisë, Gunnar Strommer, tha se qeveria po ndjek nga afër situatën.

“Ne jemi informuar për një incident të rëndë në Fagersta. Policia është në vendngjarje dhe po punon shumë intensivisht për incidentin. Qeveria është në kontakt të ngushtë me policinë dhe po monitoron zhvillimet në vazhdimësi,” tha ai.

Bashkia Fagersta bëri të ditur se do të mbajë një konferencë për shtyp për të dhënë detaje të mëtejshme.