Sulmet ndaj Thethit dhe “Paketës së Maleve/ Rama akuzon opozitën: Po përdor 90% profile false për të përhapur gjuhë urrejtjeje

Kryeministri Edi Rama ka komentuar publikisht lidhur me reagimet dhe kritikat në rrjetet sociale ndaj iniciativës së qeverisë, “Paketa e Maleve”. Përmes një postimi zyrtar, shefi i ekzekutivit i nxit qytetarët të lexojnë argumentet e kritikëve, duke pretenduar se mbrapa shumicës dërrmuese të tyre fshihen adresa joautentike të orkestruara nga faktori politik opozitar.

Sipas Ramës, fushata e komenteve negative që pasoi takimet e tij me sipërmarrësit dhe banorët lokalë në Theth përbën një sulm të drejtpërdrejtë me prapavijë politike.

Në reagimin e tij, Kryeministri ka komentuar aktorët politikë që, sipas tij, po ushqejnë këtë klimë komentesh, duke publikuar njëkohësisht edhe faksimile të disa prej reagimeve në rrjet.

“Lexoni ARGUMENTAT E KUNDËRSHTARËVE TË PAKETËS SË MALEVE dhe kini parasysh se 90% e tyre janë vërtetë profile fallco, po mbas atyre profileve qëndrojnë pikërisht sorrat e opozitave parlamentare dhe korbat e opozitave imagjinare”, shkruan kryeministri.

Rama theksoi se gjuha e përdorur në hapësirën digjitale ndaj komunitetit vendës është e papranueshme, duke kërkuar nga publiku të reflektojë mbi alternativën që ofron opozita.

“Shikojeni se si i shajnë, mallkojnë, ofendojnë gjithë ata burra sot në Theth dhe mendojeni vetëm për një sekondë, që këta shpirtra të bardhë si sytë e sorrës dhe pendët e korbit, të kenë në dorë fatin e Shqipërisë.”, thekson Rama.

Postimi i plotë i kryeministrit shoqëruar edhe me faksimilet

“Lexoni ARGUMENTAT E KUNDËRSHTARËVE TË PAKETËS SË MALEVE dhe kini parasysh se 90% e tyre janë vërtetë profile fallco, po mbas atyre profile qëndrojnë pikërisht sorrat e opozitave parlamentare dhe korbat e opozitave imagjinare, të cilat e shndërruan Bulevardin e Flamingove në Sheshpërsheshin e Vulgaritetit, ku jashtënxirret llumi i gjuhës së urrejtjes me sasira e ndotësira që ai bulevard s’i kishte parë as kur nxirrte gjuhën mbi të Ndotësi i Madh i mexhelisit tonë. Shikojeni se si i shajnë, mallkojnë, ofendojnë gjithë ata burra sot në Theth dhe mendojeni vetëm për një sekondë, që këta shpirtra të bardhë si sytë e sorrës dhe pendët e korbit, të kenë në dorë fatin e Shqipërisë”